Andam na ang tag 25 kilos nga bugas nga ihatag isip ayuda sa kada panimalay basta makasumiter na sa listahan ang mga kapitan sa 30 ka barangay ngadto sa buhatan ni Mayor Ipe Remollo para masugdan na ang pagpanghatag.

Apan kadtong nakadawat ug hinabang pinansiyal gikan sa Social Amelioration Program or SAP og Unconditional Cash Transfer (UCT) dili na pwedeng tagaan sa hinabang nga bugas para dili na magdoble.

Base sa listahan sa City Social Welfare and Development (CSWD) adunay, 26, 478 ka households o bobong ang nakadawat sa SAP ug sa UCT.

Busa gi-awhag ni Mayor Remollo ang mga kapitan sa 30 ka barangay nga isumite ang mga listahan sa angayan makadawat sa bugas tungod kay wala sila maapil sa ayuda gikan sa SAP.

Dugang ni Mayor Remollo iapil sa listahan (dato man o pobre) para mahatagan sa bugas nga ayuda gikan sa kagamhanang lokal sa Dumaguete ang mga panimalay o household sa:

1. Tanan ng wala makadawat ug SAP o UCT
2. Kadtong gapuyo sa mga subdivisions
3. Mga Barangay officials lakip na ang SK
4. Mga Barangay Tanods, BHWs, Day Care Workers
5. Mga Empleyado sa gobyerno lakip na mga Job Order Workers ug takay
6. Mga senior citizens nga wala naapil sa SAP ug UCT

Human masumite ang listahan sa kada barangay kini iverify sa kagamhanang siyudad para pinal na ang gidaghanon sa makadawat. Kinihanglan mopirma ang mga nakadawat sa ayudang bugas para masuta kung kinsa ang nakadawat base sa listahan.

Nanghinaot si Mayor Remollo nga hapsay ug matinud-anon ang hataganay sa ayudang bugas ngadto gyud sa mga panimalay nga wala naapil sa SAP ug UCT.

Nagpasalamat si Mayor Remollo sa konseho ning siyudad pinanguluhan ni Bise-Mayor Alan Gel Cordova tungod sa pag aprubar ug gahin alang pagpalit ug bugas.

Kahinumduman nga nihatag na ug tag 5 kilos kada panimalay ang kagamhanang siyudad sa duha ka higayon nga gipaagi sa barangay sukad pagsugod sa krisis tungod sa COVID-19.