Hangyo ni Dr. Kenneth Coo, Presidente sa Philippine College of Physicians ug Chairman for the Crisis Preparedness and Management ug miyembro sa IATF, nga unta hatagan ug igong pahibalo ang LGUs kung kanus-a moabot ug taga-asa ang mga residente og OFWs nga gipapauli gikan sa kaulohan ug uban pang dapit sa nasud pipila ka adlaw una molanding sa airport o modunggo sa pantalan.

Andam ang kagamhanang lokal ug ang Inter-Agency Task Force COVID-19 ubos ni Mayor Ipe Remollo nga dawaton ang mga Overseas Filipino Workers ug Locally Stranded Individuals tungod kay sila aduna usab katungod nga mobalik dinhe sa ilang mga pamilya.

Apan gihangyo usab ang mga awtoridad sa kaulohan lakip nga ang Overseas Workers Welfare Administration (OWWA) nga makigsabot sa Provincial IATF ug City IATF kung kanus-a gayud ang mga biyahe, pila ang sakay sa barko o eroplano og asa sila nga lungsod o siyudad mopauli. Kini para sa tukmang pagpangandam sa habig sa mga LGUs ug malikayan ang kalibog nga nahitabo sama niadtong milabay nga adlaw.