Turno na usab sa mga tindera ug masahista nga modawat sa tag P 2, 500 nga ayudang pinansiyal gikan sa kagamhanang siyudad sa Dumaguete ugmang adlawa, Biyernes, dinha atubangan sa City Treasurer’s Office.

Matud ni Mayor Ipe Remollo ang makadawat sa ayuda mao kadtong mga miyembro sa mga asosasyon nga rehistrado sa Sectoral Desk Office ubos ni Mr. Albert Aquino nga naapektohan ang panginabuhian tungod sa COVID-19.
Basi usab sa patakaran, kadto lamang mga manindahay ug masahista nga wala naapil sa Social Amelioration Program (SAP) ang puedeng modawat sa tag P 2, 500 gikan sa siyudad.

Ang mga opisyales sa asosasyon ug Sectoral Desk Office ang pormal nga mopahibalo kung kinsa sa mga miyembro ang angayan modawat sa ayuda.

Busa giawhag ang mga hingtungdan nga moadto sa:

TINAGO GYMNASIUM – mga masahista

CALINDAGAN MULTI-PURPOSE GYM – mga manindahay ug pagkaon, prutas, utanon, balot, ornamental plants, tempura, ukay-ukay, banana cue vendors ug manikurista

MANGNAO GYM – mga porter

Adunay bus nga mohatod sa mga benepisyaryo gikan sa gym ngadto sa City Treasurer’s Office dinha sa Burgos Street kinihanglan nga mogamit ang tanang ug face masks.
Kung adunay mga pangutana moadto lang sa opisina sa Sectoral Desk.

Karung Sabado ang mga drayber sa traysikel nga rehistrado sa Sectoral Desk Office ug wala naapil sa SAP ang hatagan ug tag P 2, 500 gikan sa siyudad.

Nagpasalamat si Mayor Remollo sa miyembro sa konseho pinangolohan ni Bise-Mayor Alan Cordova tungod sa pagahin ug pondo para adunay mahatag nga ayuda usab ang siyudad ngadto sa mga manindahay, masahista ug mga drayber nga naapektohan ang panginabuhian.