RIZAL BOULEVARD REHABILITATION ipadayun bisan pa kung ang ubang konsehal dili pa andam mosuporta

Gipasalig ni Mayor Felipe Antonio Remollo nga iyang ipadayun ug patuman ang proyekto nga pag-ayo ug pagpalapad sa Rizal Boulevard dinha sa dapit sa Dumaguete Press Club para mas luwas ang katawhan ug kabtangan bisan pa kung kusog ang hapak sa balod ug atol nga bagyo.

Apan atol sa nilabay nga sesyon ang resulta sa botohanay 6-4 diin unom lang ka konsehal ang niboto pabor sa proyekto: Konsehal Karissa Tolentino-Maxino, Joe Kenneth Arbas, Lilani Ramon, Micheal Bandal, Manuel Arbon ug SK President Danni Tolentino.

Ni-abstain silang Konsehal Agustin Miguel Perdices, Jose Victor Imbo, Manuel Sagarbarria ug Liga President Dione Amores.

Samtang absent sila Konsehal Alan Cordova ug Estanislao Alviola.

Kini nga proyekto sa Rizal Boulevard mokostar ug P 34.7 million nga pondohan sa national government kay apil niini ang pagreclaim sa dagat para makagama ug hapit usa ka ektarya nga kongkretong pantawan diin puede gam-an ug walkway ug dulaanan sa beach volleyball, handball, frisbee ug uban pang sports.

Ang pagbutang ug shoreline protection dinha sa Barangay Tinago para dili usab masudlan ug dagkong balod ug storm surge ang mga kabalayan kini adunay lahi nga plano ug pondo nga ipatuman sa siyudad.