Para maprotektahan ang interes sa mga consumedor sa Dumaguete Water District, nipasaka ug kaso si Mayor Ipe Remollo batok sa mga opsiyales niini para ipahunong sa korte ang tanang kasabutan nga naumol nila tali sa higante nga kompanya nga MetroPac Water Investment Corporation.

Basi sa kasabutan 80% sa bag-ong kompanya nga mopadalagan sa water district ang kontrolado na sa MetroPac ug 20% nalang ang sa DCWD.

Supak si Mayor Remollo kay mas momahal na unya ang balayran sa tubig kay ang pribadong kompanya naman ang mopadalagn ug mag boot sa taripa sa tubig sama sa Maynilad didto sa kaulohan. Giapil usab sa kontrata ang Septage Waste Water Treatment System sa Camanjac nga tag-iya man usab ini ang Siyudad sa Dumaguete.

Daghan usab nga mga empleyado niini ang mataktak sa serbisyo kay kinihanglan man nga moresign ang tanan aron makapili ang pribadong kompanya ug bag-ong empleyado.

Gipanalipdan ni DCWD General Manager Esperato Dicen ang ilang kontrata tali sa MetroPac apan matud pa ni Mayor Remollo angayan kini nga dili tugutan sa korte tungod kay adunay daghang iregularidad ang kasabutan ug kini makadugang ug kalbaryo sa mga consumedor.

Ang kaso karun naa sa sala ni RTC Branch Judge Cenon Voltaire B. Repollo ug kini adunay hearing para sa preliminary injunction karung Setyembre 12, 2018. Ang pagsaka ug kiha ni Mayor Remollo kini gisuportahan sa konseho ning siyudad pinaagi sa SP Resolution No. 126.

#StopDcwdPrivatization