KINSA ANG GAKONTROLAR SA PRESYO SA ISDA DINHA SA MERKADO PUBLIKO?

Gipanghimakak sa kadagkoan sa Bureau of Fisheries and Aquatic Resources, Department of Trade and Industry, Department of Agriculture og City Economic Enterprises Officer Engr. Jose Ronnie Fortin nga aduna silay gahom nga ikontrol ang presyo sa isda dinha sa merkado publiko.

Giklaro usab ni Engr. Fortin nga wala nila gilimitahan ang supply sa isda sa merkado publiko ug gani mas malipay sila kung mas daghan ang mosulod nga suppliers kay mas mobarato ang presyo ug adunay makonsumo ang katawhan. Kada adlaw dul-an 35 ka tonelada nga isda ang kinihanglan sa merkado publiko apan tungod kay gikan pa nibagyo, amihan na usab ug bulanon gamay nalang gyud ang supply sa isda karun. Mopili usab ang mga panagatan kung asa nila ihandos ang ilang supply, swerte ang Dumaguete kay adunay pay mosupply sa panihanglanon sa siyudad.

Samtang gipalanog usab sa mga fish vendors nga wala sila nagpasagad ug usbaw sa presyo sa mga isda o nanikas tungod kay gasalig lamang sila sa supply gikan sa mga lantsa nga mohandos sa ilang mga produkto dinha sa fish terminal. Ang manindahay kinihanglan usab nga mobawi sa puhunan, gasto sa labor, bayad sa pagbyahe ug uban pang galastohan. Ang supply sa atong isda dinha sa merkado publiko gagikan kini sa Mindanao, tungod kay wala nay supply gikan sa Bayawan City.

Si DTI Provincial Director Javier Fortunato nipasabot nga bugtong ang gitawag nga law of supply and demand ang rason sa pagsaka ug pagkunhod sa presyo. Kay kung nihit kaayo ang supply mahal usab ang presyo; kung taas ang supply, momaba usab ang presyo. Busa ang tambag ni Fortunato nga tungod kay mahal paman ang presyo adunay kapilian ang consumidor nga mopalit bisan mahal o mopalit nalang sa laing produkto sama sa karne baboy or manok samtang gahulat nga mobarato na usab ang presyo sa mga isda.