RESPONSE TO THE POST OF A “CONCERNED CITIZEN” in Dumaguete Awareness PAGE

ASK the right questions in the right forum and you will be provided with the appropriate answers by the concerned officials.

This will help one become an informed and engaged citizen.

P23 MILLION GIGAHIN PARA PAG-AYO SA DIKE UG SPILLWAYS

P 100 MILLION GI-ANDAM PARA PAGTUKOD UG TAYTAYAN

Kini isip update sa mga nagutana, bag-o lang gi aprobahan sa Konseho ang request ni Mayor Felipe Antonio “Ipe” Remollo nga sobra P 23 million para ayuhon ang spillways ug dikes dinha sa likod nga bahin sa Foundation University sa Colon og dinha unahang bahin sa Bureau of Internal Revenue sa Taclobo.

Sugdan na ang pag-ayo human mapalit na ang materyales tungod kay moagi pa kini sa proceso ug bidding. Ang City Engineer’s Office mao ang mopatuman sa proyekto. Susama sa katawhan gadali pod ang administrasyon nga mapatuman na ang proyekto kay kadaghanan pod kanila moagi bya pod sa mao nga mga spillways kay pareho ra kitang gapuyo sa siyudad. Pareho lang kita nga nahasol tungod sa kahoot sa traffic. Apan nasayod kita nga ang proceso sa gobyerno kini kuti ug taas kaayo dili kita angayan nga molaktod o mo short cut sa proceso kay mabutang usab ang mga opisyales sa risgo o kaha mag atubang ug sumbong kay kinihanglan sundon ang nakalatid sa balaod ilabi na sa Republic Act 9184 o Government Procurement Reform Act.

Samtang si Mayor Remollo nakakita ug pondo nga kini magahin para sa pagtukod og taytayan likod sa Foundation University P 50 million ug sa BIR Taclobo P 50 million o mokabat ug P 100 million gikan kini nga pondo sa siyudad sa Dumaguete tungod sa pagkugi ug paningil sa buhis ug wala pagwaldas sa kwarta sa panudlanan niining administrasyon. Kumbinsido si Mayor Ipe Remollo nga ilisan na ug taytayan ang mga spillways para permanente na ang solusyon sa kanunay nga pagbaha sa maong dapit kini para dili pod mabutang sa kakuyaw ang mga lupyo og ilang mga kabtangan. Karung Enero mo request si Mayor Remollo sa Konseho nga aprobahan ang pondo para masugdan na ang subasta sa duha ka taytayan.

KAHUOT SA TRAPIKO
Hapit na mahuman ang taytayan dinha likod sa Vida Royal, kulang nalang nga mosogot ang mga tag iya sa balay ug luna sa isig ka daplin niini sa Cadawinonan ug Candau-ay nga mobiya na para masemento ug magamit na ang lugar isip agianan paangat sa taytayan. Plano ni Mayor Remollo nga tanang dagko nga truck, bus ug jeepney didto na unya moagi kay sumpay kini sa diversion road ug makatabang paglu-ag sa trapiko dinha sa downtown. Gihugtan usab ang pagpatuman sa mga lagda sa trapiko para madisiplina ang mga drivers samtang padayun ang negosasyon para moabre ug bag-ong mga dalan.

PAGSIRADO SA DUMPSITE UG PAGTUKOD UG SANITARY LANDFILL
Hingpit na nga sirad-an ang dumpsite sa Candau-ay dungan sa pagtukod usab ug sanitary landfill dinha sa maong barangay diin kini pinasubay sa pag-uyon sa DENR kay ang landfill mao ang legal nga paagi para paghipos sa mga dili malata ug mapuslan nga basura. Aduna nay luna nga paliton 3.5 hectares sulod sa industrial zone ug kini ipailalum sa makuting pagtuon sa DENR para mahibal-an kung luwas ug angayan ba kini nga tukoran ug landfill. Samtang upat (4) na ka brand new nga garbage compactors ang napalit para mohipos sa tanang basura libot sa dakbayan. Apan ang mga panimalay ug barangay mao ang responsable sa paghipos ug pag segregate sa mga malata, dili malata ug dili mapuslan nga basura pinasubay sa balaod. Igo ra nga mokolekta ang siyudad sa mga dili-malata ug dili mapuslan.

PAGPALIT UG P44 MILYON NGA BRAND NEW HEAVY EQUIPMENT
Gipanglantawan nga sunod tuig mapalit nga ang mga brand new nga heavy equipment para magamit sa proyekto sa mga barangay ug siyudad, pag operate sa sanitary landfill ug atol sa mga pagbaha. Ang mga heavy equipment nga napalit niadtong unang termino ni Mayor Remollo ang nagpabilin pa karun nga gigamit sa siyudad human ang dul-an 16 ka tuig pamatuod nga sila tinuuray nga brand new sa dihang gipalit kini.

350 CCTVs SUNOD TUIG 2018
Humana ang pre-bid conference para mamuntar ang dul-an 350 ka CCTVs sa 30 ka barangays tibook siyudad. Busa human sa subasta or bidding mamuntar na ang mga CCTVs sunod tuig isip pagtuman sa saad ni Mayor Remollo para makatabang sugpo sa krimen, pagmonitor sa traffic ug kalamidad. Lima ka mga kompanya ang andam moapil sa subasta.

UBANG PROYEKTO
Tinood adunay nga proyekto nga gipatuman para makadani ug mga turista sa siyudad samtang ang gitrabaho karun dinha dool sa tempurahan sa boulevard nga edipisyo ang unang tumong ana mao ang shoreline protection kay kusog na ang hampak sa balod ug pagpalapad sa agianan sa mga nag jogging ug walking dinha.

Ang restoration sa old Presidencia o city hall karun kini adunay gahin nga P50 milyon ug masugdan na karung Enero 2018 para mas mapalambo ang atong city hall hangtod sa Quezon Park ug Bell tower.

PAMASKONG HANDOG 2017
Tanan nga kwalipikadong senior citizens, PWDs ug indigent families lukop 30 ka barangay kini makadawat ug pinaskuhan gikan sa siyudad. Giaprobahan ni Mayor Remollo ang pagrelease sa kwarta ug pondo para karung pasko apan ang lista sa makadawat kini gikan sa mga BHWs ug social workers nga assigned kada barangay ubos sa City Social Welfare and Development Office kay mao kana ilang trabaho. Busa tanang pangutana kabahin ngano wala sila kadawat kini matubag lang samaong mga empleyado.

Tanan nga priority projects kana lain lain ug gahin ug giplano na sa milabay pa nga tuig. Dili tinood nga walay pondo para sa ubang proyekto kay gibahig ug giapod apod na ang budget sa CCTVs, pag-ayo sa mga kadalanan ug spillways, pagpalit ug ekwepo, pagtukod ug sanitary landfill ug uban pa kini tanang proyekto lahi lahi ug pondo nga nabahig na nga daan sa 2016 pa.

Padayun ang paningkamot sa adminstrasyon para mapatuman ang mga programa ug proyekto nga makabenipisyo ang mga residente ning siyudad pinasubay sa ensaktong proceso. Usahay madugay apan sundon ta ang proceso nga gilatid sa balaod. Busa kinihanglan usab ang pagsabot, kooperasyon ug ayuda sa mga katawhan tungod kay ang mga suliran ning siyudad tinood dagko ug dugay na kaayo nga gihambin sa katawhan apan naglaum ang administrasyon nga mahatagan ug tubag ug mapatuman ang tanang proyekto basta magtinabangay kita uban sa suporta sa tanang opisyales sa siyudad, distrito ug probinsya.

Daghang Salamat.