Ang suliran sa pagbaha dinha sa Barangay Banilad kini gipadangat na ni City Engineer Edwin Quirit ngadto kang Department of Public Works and Highways Secretary Mark Villar niadtong pang Agosto 25, 2017 pinaagi sa sulat. Ug gisundan kini ug follow up letter pinetsahan Nobyembre 8, 2017. (Gilakip dinhe ang kopya sa mga sulat)

Ang problema sa baha sa Barangay Banilad ug tubag sa mga opisyales kini gigam an ug artikulo ni Ms Judy Flores-Partlow og napatik sa pamantalaan nga MetroPost sa milabay nga Domingo. Kung basehon ang artikulo (ang kopya kini gilakip) ang pagtubag ug pagpasabot sa suliran sa baha dinha sa Banilad kini gikan nila City Engineer Quirit ug Kapitan Bana.Matud sa taho ni Ms Judy Flores-Partlow adunay mga tag iya nga nagdumili agian sa drainage ang ilang mga luna.

Dugang pa ni Engr. Quirit nanihanglan ug dako nga pondo (kini magahinan sa DPWH) ang pagpatuman sa proyekto kay ang tubig gikan man sa bukid sa Valencia ug nisubay sa Sapang Lagnasan dinha sa Brgy Banilad. Mobaha gayud tungod kay naabongan naman sa mga alad ug kabalayan ang lagnasan ug wala nay magawsan ug tarung ang tubig baha.

Basi sa pakisusi, ang siyudad adunay gigahin nga pondo para magam-an ug drainage canal para modiretso ug lapos ngadto dapit sa Ihalason Beach ang tubig baha para dili na unta kini modanaw sa dalan ug kabalayan.

Apan nanawagan usab ang katawhan sa buhatan sa atong Congresista Manuel Sagarbarria para makaalayon ug pangitag pondo dinha sa kaulohan (dool man usab siya sa DPWH) para mas dali og mas dako nga flood control project ang idugang para pagsolbad sa problema sa baha.

Apan usa sa dakong babag para mapatuman ang proyekto mao ang pagdumili sa mga tagbalay nga modonar sa ilang mga luna para agian sa drainage canal. Padayon nga nihangyo Kapitan Raul Bana ug mga inhinyero sa siyudad nga mosugot sila nga modonar og parte sa ilang mga luna para agian ug tukuran sa drainage canal para mapugngan ang bunok sa tubig baha.

Hinaot dunggon sa katawhan dinha sa Banilad ang hangyo sa gobyerno o bisan sa DPWH para masolbad na ang suliran kabahin sa pagbaha dinha. Nakasabot ang kagamhanan sa siyudad sa kalisod sa kahimtang sa katawhan dinha sa Banilad. Dugay na ang mao nga problema sa pagbaha hapit na kapin sa dose ka tuig. Kaniadto pa ang problema apan ang solusyon naa ra usab sa katawhan nga nanimuyo sa maong lugar. Hinaot mosakripisyo ang mga tag iya sa luna para mapadayun ang pagpatuman sa proyekto sa dili pa mahitabo ang katalagman.

Daghang Salamat.